Psalms 135

Pfumu widi wumboti

1Luzitisa Yave,
luzitisa dizina di Yave,
lunzitisa beno bisadi bi Yave ;
2beno lunsalanga mu Nzo Yave,
mu ziphangu zi Nzo yi Nzambi eto.
3Luzitisa Yave bila Yave widi wumboti ;
luyimbila minzitusu mu diambu di dizina diandi,
bila didi diambu di kitoko.
4Bila Yave wukisobudila Yakobi mu ba wandi veka,
Iseli, mu diambu kaba kiuka kioki kavuidi niandi veka.
5Nzebi ti Yave widi wunneni,
ti Yave eto widi wunneni viokila zinzambi zioso.
6Muaki Yave weti vanga moso kazodidi,
mu diyilu ayi vava ntoto,
mu mimbu ayi mu mabulu mawu moso madi thipula.
7Niandi wuntotulanga matuti mu zitsongi zi ntoto ;
niandi wumfidisanga zitsiemo va kimosi ayi mvula
ayi wuntotulanga phemo mu bibuangu biandi biobi kalundila wawu.
8Niandi wuvonda bana batheti mu Ezipite,
bana batheti ba batu ayi ba bibulu.
9Wufidisa bidimbu biandi ayi matsiminanga
va khatitsikꞌaku, a Ezipite
mu diambu di nuanisa Falawo ayi bisadi biandi bioso.
10Niandi wuvonda makanda mawombo
ayi wuvonda mintinu mi lulendo.
11Sihoni ntinu basi Amoli ;
Ongi ntinu basi Basani
ayi mintinu mioso mi Kana.
12Ayi wuvana zitsi ziawu banga kiuka ;
kiuka kuidi Iseli, batu bandi.
13Dizina diaku, a Yave, dinzingilanga mu zithangu zioso,
zitsangu ziaku, a Yave, mu zitsungi zioso.
14Bila Yave wela nungisa batu bandi
ayi wela mona bisadi biandi kiadi.
15Bitumba bi makanda bidi bi palata ayi bi nolo ;
bivangulu mu mioko mi batu ;
16bibeki miunu vayi bilendi tuba ko ;
meso vayi bilendi mona ko ;
17Bibeki matu vayi bilendi wa ko
bisi kadi phemo ko mu miunu miawu.
18Batu bobo beti vanga biawu bela ba banga biawu
ayi buawu bobo buela bela bobo bantulanga diana mu biawu.
19A nzo yi Iseli, luzitisa Yave.
A nzo yi Aloni, luzitisa Yave.
20A nzo yi Levi, luzitisa Yave.
Beno lueti kunkinzika, luzitisa Yave.
21Bika nzitusu wuba kuidi Yave tona mu Sioni
kuidi niandi weti vuanda ku Yelusalemi.
Luzitisa Yave.